2016 hämmer die grassierendi Vrbottskultur in unsrer Stadt usgspiilt - es isch jo bald wirgligg nüt meh erlaubt! nit emol me lächle dörfsch hösch ...

 

Drzue het dr CT no e chileenischs Färnsehteam miesse stopfe, hejo glar!

 

 

de Bâlaari lipfts dasjoor dr Huet,

mir hänn e riise Waggis-Wuet.

Me gseht allbott wie das so isch

do am mym Rhyy als glayne Fisch.

 

Bald waisch jo nim wo aaneschryybe,

was isch vrbotte, was losch blyybe?

Mr mache das scheen analog:

do wär dr Buessekatalog.

 

20 Stutz

dr Santiglaus het numme welle

am Sunntyg syni Riebli schelle.

e Schuggermysli heten gseh,

jetz git s e Buess, ojeminee.

 

40 Stutz

... und ischer ab em Bläche muff,

no heert dä Saich no lang nit uff.

Grad no-n-e Buess, es isch nit gspässig,

will sy Vysaasch ischre z hässig.

 

50 Stutz

y glaub s jo nit, nai bhietys nai,

jetz kemme die scho zue mir hai.

Dr Schugger lot kai Gnaad hit walte,

“Meersoili myen Sy z zwayte halte!”

 

e Lappe

e Binggis grännt, voll vo de Sogge,

e Schuggermysli duet en schogge.

“s isch nit erlaubt, muesch gar nit maine,

mit em Dreyrad z rötze-n-in dr Staine.”

 

und grad nomol e Lappe...

sy Bruedr kunnt nit bessr wägg,

au är wird byesst, es isch kai Schlägg.

„Egal wie schnäll duesch ummehetze,

im Bobbycar gilt Helmpflicht jetze.“

 

zway Läppe

dr Babbe kha das gar nit fasse,

jetz kunnt är sälbr no an d Kasse.

jä z Basel lehrsch es nodisno:

zem Lache muesch in Källr go.

 

Haftstroof

en Aff im Zolli, ussr Rand und Band,

isch fir die ganzi Stadt e Schand.

Är gratzt sy Kopf und glycht drbyy

fasch hoorgenau em Morin Guy.

 

... und s Fazyt?

In ihrem Roothuus-Büro-Myyf

sinn d Sässlfurzer kreatyv.

Si liebe d Adminischtratioon,

und zyehn eso e digge Lohn.

 

Ab dr Vrbottskultur gosch druff,

do heert s Vrständnis goppeloni uff.

Jetz haissts die drey Dääg voll gnyesse

- no diens ys Zeedelschryybe au no byesse!

 

 

............................................................................

 

 

Hesch dä Zeedel ganz glääse?

Laidr git das e Buess vo CHF 20.-.

Ainewääg e scheeni Fasnacht.

 

malefyz-balaari@gmx.ch