Posityv, Negatyv, Rohling und Co.: e Waggislarve baue

Vyyli frooge wie unseri geniaale Larve aigentligg entstöhn.

Mr wänn gärn emol zeige wie uffwändig und aspruchsvoll das Handwärgg vom Waggislarve-Baue isch. s Larve baue umfasst 8-9 Arbetsschritt:


Zersch emol tusche sich die Aggtyve zämme mit em Larvebauer übr s Sujet us und entschaide wie se öbbe sötti usgseh (Usdrugg, Naaseform, etc.), Perügge, eventuell au scho Accessoires wie Perret, Huet, Stumpe in dr Schnuure, etc.


Drnoo modeliert dr Larvemacher us Ton e Posityv (Schritt 1). Das gseht eso us:

 

 

Das Posityv wird mit Gips usgosse, und das git s Negatyv (2). Das wird gschnitte und zrächtgmacht, so ass es öbbe dr Grössi vo dr Larve entspricht (3). In das Negatyv wird jetz cachiert: mit Larvepapier und Kleischtr wird die eigentligi Larve härgstellt (4). Nochdäm s hart isch, wird dr Rohling abasst, also nomol zrächtgschnitte, glyymt und glettet (5) und gseht jetz praggtisch scho wie-n-e blutti Larve us.



Jetz wird en eifache Plastygghelm (friehnr s Güpfi us Karton) fix montiert (6) und d Larve e jedem Dräägr individuell abasst (will jo jeede Mogge anders isch – das kha im Fall au Probleem gäh wemme Larve occasion odr vo dr Stange boschtet, me muess se fasch immr no abasse zem en ideal Sichtfäld garantiere).

Jetz ersch kunnt s Moole (wobyy e jeede Larvebauer sy eigene Styl het, wär luegt kha d Larve an dr Fasnacht relativ schnäll emmene Atelier zueordne; 7). Noch de Montagearbete (Accessoires akläbe, yboore, stanze etc.; 8) wird am Schluss no laggiert und d Perügge montiert (9).


Und wenn e Waggislarve noch guet 15-20 Stund paraat isch, no gseht si an de drey scheenschte Dääg eso us (Fasnacht 2014, Sujet: „Baiz-opoly am mym Rhyy“):


... und vo dene git s uff dr ganze Wält genau zwai: die vom CT und die vom Däni S.

 

e Larve baue brucht vyyl Erfahrig und Yebig, handwärggligs Gschigg und s isch zytintensyv.


E jedi Larve isch en Ainzelstigg und widr e chli andersch, und mit dr Massewaar us Plastygg, wo lychtr und robuschtr isch (es isch scho mänggi cachierti Larve kaputt gange, wo se uff e Boode keit isch), odr vo vo dr Stange kunnt, hett das nüt, abr au gar nüt, z due.

 

e Larvebauer in sym 7. Himmel (Balaari Skizze an dr Tafele!!)
e Larvebauer in sym 7. Himmel (Balaari Skizze an dr Tafele!!)