Schorsch vom Haafebeggi II
Also tschuldigung, Hand uffs Härz ohni dr Schorsch vom Haafebeggi II? Undänggbar...
... und jetz ganz langsam und vo afang a: Basler sinn jo sälte rabiat, abr es gitt Ussnahme (alli berächtigt natyrligg, zem Byspyyl kultuurlosi Rampasse). Aini drvoo hett’s an dr Fasnacht 2001 gäh, y mag mi no beschtens bsinne. Im Kaffi Spitz hett’s e längeri Pause gäh zwische de Bängg und d’Lyt hänn halt afo schnuure wie me’s eso macht. Zwai ussem grosse Kantoon sinn relativ wyt vorne gsässe und hänn sich agregt vo dr Fasnacht vrzellt und geschwätzt und palavert und und und … und vor luter Schwätze gar nit gmerggt ass dr Schorsch vom Haafebeggi II uff dr Byhni gstande-n-isch und hett welle losleege. No isch dr erschti Bangg koh und die zwai sinn immr noni ruhig gsi. Kennet ihr eych vorstelle was do los gsi isch? Es hit e muggeseggli gfählt und die baide wäre vo dr rasnde Meuti (und em staihässige Baizer und em SF DRS Kamerama) im Rhyy entsorgt worde. Und das sait scho alles uss ibr dr Schorsch. Fuffzig Johr Fasnacht! Ä läbigi Ikone. Aine wo alles gseh hett und aine wo alli gseh hänn (und hänn miesse gseh). Aine wo au Zircher zem lache brocht hett, me stell sich das vor!!
Es isch aifach still gsi wenn är koh isch, und gege s’Ändi vo synere lange Karriere hänn d’Lyt in dr Safferezumft scho afoh lache wo dr Schorsch no im Spärbr gsunge hett. Sy Byhnipresänz isch aimolig gsi und syni Bängg sinn presto legendär und unstärbligg worde, me hett se no bis zer nögschte Vorfasnacht verzellt, e paar besser, anderi … jo lömmer das. Und es gitt no mängge wo sait d’Fasnacht isch nymmi s’glyyche syt dr Schorsch d’Larve im ’06 an dr Naagel ghänggt hett. Das kah nit emol e Waggis saage.
Ganz hett är’s zem Gligg nit kenne lo syy; sy Websyyte
http://www.schorsch.ch.vu/
isch immr e Bsuech wärt und au fir Waggis empfählenswärt (ai du scheene, ai du scheene, ai du scheene … Helge zem aluege, lääse kenne mer jo nit).
Et voilà, Schorsch, y frai mi wie dr Aff ass de drbyy bisch - Byhni frey fir dr Schnitzelbangggrossaltmaischtrguru:
1. Was isch dy ydriggligschti Fasnachtserinnerig?
2006 Verabschiidig vo dr ganze Stadt. Ständing Oweyschen in de Baize
2. Was ka dy an dr Fasnacht närve?
wye gfäärlig sy hüt an d Wäge hänge zem öbbis z ergattere
3. Welli drey Wörtr falle dir zem Begriff „Waggis“ spontan y?
Zoggeli, Nase, frächi Schnuure
4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
dasch e Furz
5. Basel ohni Fasnacht isch wie …. ?
wye Schutte ohni Balle
6. Was bringt di so richtig uff’d Palme?
Wenn y 10 Stutz für e Stügg Ziibelewäje muess schütte
7. … und ibr was kasch dy eso richtig froie?
Wenns dätscht und Rääblet in de Gässli
8. E liebs Familiemitgliid schänggt dir zem Geburtsdaag e FCZ-Saisonabo –was machsch?
Ich wurds dir gä wenn s wotsch
9. Wenn Ziiri ‚Downtown Switzerland’ isch, denn isch Basel… ?
wo isch das… Ziiri?
10. Was isch fir di dr scheenschti Ort z’Basel?
d Bar im Trois Rois
11. Was wurdsch an Basel - odr an dr Schwiz - sofort ändere?
ich wurd Basel zur Hauptstadt vo dr Schwyz mache
12. Mit wellem Mensch (ob lebändig odr nit) wottsch du gärn emol znacht ässe?
mittem Obama oder Dängeli wenner no wär
13. … und was wurdsch du die Person ganz sicher frooge?
ober mit mir im Trois Rois an dr Bar wurd e Apero nä
14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
ooni schaffe max. 4 000 000 mit schaffe vyl vyl weniger
15. Was nimmsch mit uff e-n-ainsami Insle?
dr Obama dassen denn ka frooge öb är mit mir im Trois Rois e Apero nimmt
16. Wär odr was bringt di sofort zem lache?
dyny Frooge
17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
im Blocher