Roger; Obmaa Negro-Rhygass
Froog: Worum hänn d’Negro-Rhygass Fasnachtsgschicht gschriibe?
Antwoort: Si sinn die einzige Basler Glygge wo albe 1) als Drummler und Pfyffer, 2) als Waggis uff emmene Waage und 3) als Gugge uff dr Gass untrwägs gsi sinn.
A jä… scho widr ebbis glehrt.
Agfange hett die abentyyrligi Gschicht anno 1927. E Hampfle Glaibasler hänn sich innere Gugge zämmegfunde. Dr Naame vrdangge si ihrem erschte Sujet, em Schwyzr Flugpionyyr Walter Mittelholzer, wo hett welle ibr Afrikaa fliege und im Räägewald notglandet isch (was dr Mohr an dr Pauke, s’Signet, wurd ergläre).
Das isch nit lang guet gange und d’Negro hänn sich noch em Krieg zuenere Waageglygge umfunggtioniert, will, achtig alli Dambuure bitte ewäggloose, ene d’Ruesser usgange sinn (odr abghaue, das waiss hitte niemer meh). Und es hett eso miesse kho wie’s kho isch – si sinn als Waggisglygge ygange (Waggis khasch halt aifach rauche). 1957 hett dr „Spatz" Berchtold, zämme mit e baar Glaibasler Dissi vom Lindebärg, d’Negro-Rhygass ney grindet und im Johr druff zem erschte mol am Cortège dailgno.
1964 isch an dr Claraschtrooss 59 dr Negro-Fasnachtskällr uffgange und 1973 isch me zem erschte mol im Goschdym uffdrätte, fir das d’Glygge hit stadtbikannt isch: dr Negro-Gloon (syt fasch 40
Johr Stammgoschdym). 1983, zem 25-jöhrige Jubiläum, sinn d’Negro mit ihrem „Circus-Negro“ am Drummeli uffdrätte und hänn alli andere Glygge brutaal uff d’Blätz vrwiise, was 's Fasnachts-Comité
(und mänggi Stammglygge, sait me) bis hitte nit ganz vrgrafftet hänn.
1984 isch dr neyi Källr ereffnet woorde, am Riechering 69 näbe-n-em Wurzegraber und bald untr em Clara-Turm (?) , derte hänn si mit dr Fränzi e bissige Nochbere (und dr Claraturm au, im Fall – und mit dr Fränzi legt sich kaine ungstroooft a, nit emol d’Negro, d’Bâlaari und erscht rächt nit dr Stadtblaanr). Me hett zem erschte mol am Glaibasler Charivari dailgno und au musikaalisch sinn d’80er anders woorde. 1988 hett me Piccolo integriert und dr Yankee Sound, s’vo wyt heerbaare Maarggezaiche vo dr Glygge, isch nodisno ins Repertoire ibrnoh woorde.
Am Seibi, wenn d’Bâlaari während em Guggekonzärt am Zyschdig zoobe am intrigiere sinn, merggt me prestissimo wenn d’Negro dra sinn. Nai, nit will sie so e originelli Musigg-Uswahl hätte („Sweet Caroline“ hänn ämmel scho alle andere 29 Gugge gspiilt, hallo), abr wie si’s spiile – dasch aifach unvrwäggslbaar. Und do, alli Waggis bitte ewäggloose, kha’s bassiere ass sogar Vollbluet-Waggis wie d’Bâlaari d’Schnuure heebe, intrigiere intrigiere syy löhn, zueloose und dängge: Zem guete Gligg sinn die kai Waageglygge me!
Fir d’Negro Rhygass legt dr Roger, dr Obmaa, sy Hand uffs Härz, und es isch s’erschte mol ass die zwyyflhafti Ehr an e Gugge goht, im Fall (nit ass es no heisst mir hätte ebbis gäge Gugge!).
1. Was isch dy ydriggligschti Fasnachtserinnerig?
Die han ich jedes Joor; am Donnschtigmorge kurz vor em vieri und zwar wenn mir mit dr Negro die letschte Meter soundgewaltig über die mittleri Brugg ins Glaisbasel marschiere
2. Was ka dy an dr Fasnacht närve?
Wenn ich am Cortège länger als e Stund im Grossbasel im Stau stand
3. Welli drey Wörtr falle dir zem Begriff "Waggis" spontan ii?
Rot blau wyss
4. Sell d'Waggis-Naaselengi vom Fasnachts-Comité reguliert wärde? (falls jo, uff wie lang maximal?)
Lieber nit, denn jedi Waggisnaase hett sini individuelli Klass
5. Basel ohni Fasnacht isch wie .... ?
Skifahre ohni Schnee
6. Was bringt di so richtig uff'd Palme?
Wenn d'Lütt an der Fasnacht d'Ohre zuehebe und das nur will mir z'lutt spiele - schön spiele mir sowieso immer
7. ... und ibr was kasch dy eso richtig froie?
Wenn d'Lütt an der Fasnacht klatsche und das nit nur will mir lutt sondern au schön spiele
8. E liebs Familiemitgliid schänggt dir zem Geburtsdaag e FCZ-Saisonabo - was machsch?
Mim Fründ im Geschäft; amene Zürcher schängge.
9. Wenn Ziiri 'Downtown Switzerland' isch, no isch Basel... ?
Dr Ort wo ich nie vermisse will
10. Was isch fir di dr scheenschti Ort z'Basel?
S'Glaibasel
11. Was wurdsch an Basel - odr an dr Schwiz - sofort ändere?
nütt
12. Mit wellem Mensch (ob lebändig odr nit) wottsch du gärn emol znacht ässe?
Mit em Malefyz-Balaari
13. ... und was wurdsch du die Person ganz sicher frooge?
Nach emne gmietligge Oobe froog i: Näme mir no aine?
14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
Soviel, dass är und sini Familie guet dervo cha läbe....
15. Was nimmsch mit uff e-n-ainsami Insle?
Mini Frau inkl. de zwei Buebe
16. Wär odr was bringt di sofort zem lache?
An dr Fasnacht e guete Schnitzelbangg
17. Letschti Froog, Hand uff's Härz: wäm wurdsch du die Frooge am liebschte zem beantworte gäh?
Dr Angela Merkel