mjps (Martin J.P. Schwitter)

Mer derfe nit vrzelle wie’s zue däm Bydraag kho isch, säll wurd ys jo nit emol dr Fährimaa glaube… also e baar harti Faggte: dr mjps (alias Martin J.P. Schwitter) schafft aigentligg bi dr Suchtinfo Schweiz am Spaalebärg 32 z’Basel und NAI, är isch NIT Fährimaa (machet ys bitte dr Thurnyyse nit schyssig mit so Frooge). Abr als Kind vo unsrer Stadt schrybt dr mjps gärn Biecher und isch an dr Fasnacht untrwägs.
Mit syne „Fährymaa-Gschichte“ („Wenn dr Fäährymaa das Biechli in d Händ nimmt und ally die luschtyge aber au bsinnlige Gschichten und Gschichtli afooht lääse, woner sälber erläbt het, denn kenntys syy ... ass denn am Fäährschtääg e weeneli muesch „Schturm“ lytte, bis asser uss syne Daagdraim verwache duet und Dy zer Iberfaahrt abholt“) hett är schnäll kenne Fuess fasse und das schlangge Biechli und syni Gschichte ibr’s Lääbe hett sich syt 2010 guet vrkauft (und syt 2011 gitt’s „Dr Fäährymaa und dr Babbe Rhyy“, au sehr z’empfähle!).

Es isch e glungeni Sach wie’s zue dene Gschichte kho isch: dr mjps isch Mitgliid gsi vo-n-ere Baukommissioon (zämme mit Architeggte, Jurischte und andere gspässige Gstalte) und zem die Sitzige e glai z’belääbe hett är Themene wo zersch offiziell und drnoo in dr Baiz diskutiert woorde sinn als „Fährymaa-Gschichte“ (frey erfunde plus) uffberaitet und mit em Protokoll mitgschiggt. E Vrleeger hett eso dr Blausch kha ass … und dr Räscht isch Gschicht.

Und jetz bitte alli uffbasse: dr mjps hett nie e Honoraar gno abr sy Gaasche in e Fonds gsteggt zem junge und jungbliibene Autoore und –inne e Druggzueschuss z’ermeegligge. Ass es das no gitt hitte… also kaufet bitte mindischtns 100 Exemplaar, s’isch alles fir e guete Zwägg.

Fir uns hett är exgglusyv e Gschichtli gschriibe wo-n-er numme do kennet lääse, ‚d’Helgeträägr’, vo zwai Waggis wo am Fasnachtsmäntig bim Fährimaa... (sälbr lääse in dr Rubrigg „Waggis-Literatuur“).  

dr mjps als Antiquierte uff dr (wilde) Pyschte
dr mjps als Antiquierte uff dr (wilde) Pyschte

 

Wo mer jetz also bi dr Fasnacht wääre, und ere gwisse Seelevrwandtschaft. Dr mjps, als Freygaischt, hejo!, isch an dr Fasnacht … NAI laidr nit als intrigierende Waggis untrwägs, falsch, drfiir als Schnitzelbängglr. Syt 1985 isch är als Antiquierte uff dr Pyschte.

Uff dr Websyyte
http://www.die-antiquierte.ch/
wärde mer juschtamänt hällheerig. Die Antiquierte schryybe:

„Vo Aafang aa simr als "Wildy" uff d Gass, hän vorallem d Käller und d Perypherie-baize als unser Revier entdeggt und hänn ys derten usstobt … Wild und frey bedytted, ass mr kainere Schnitzelbanggorganisatioon aagheere dien, sondern ass mr sälber Route, Zytte und Duur dien wähle. Nit, dass mr ebbys geege die organisyerte Bängg hätte! Aber mr sin allne Aafrooge … ussgwiche, wills halt nit Scheeners git als d Freyhait, als Wilde aifach emol naymen aanesitze z kenne, e Pause z mache und em Fasnachtstryybe uff dr Gass zu z luege!“

Kunnt aim das bikannt voor? Rychtig! Wenner jetz nomol uff d’Bâlaari-Willkommensyyte göhn, no läset er derte: d’Malefyz-Bâlaari sinn

„Waggis wo dr Wääg nit vom Zyyl kenne untrschaide, iberall und niene dehaime sinn, absyts vom Stroom Fasnacht mache und nit braav mitdäppele, nit subventioniert sinn drfir stolz, unabhängig und vogelfrey im Gaischt, e grossi Schnuure und schampaar vyyl drhintr, strukturierti Chaoote wo mit allne intrigiere ...“

Die Paralleele in dr Geischteshaltig zu Chaos, Ornig und Obrigkait hänn ämmel scho zue Ibrleegige gfiehrt, ass d’Bâlaari emol mit de Antiquierte uff d’Gass kennte goh und ene in de Källr als Helgedräägr kennte assischtiere, genau eso wie in dr Gschicht, wo dr mjps exgglusyv gschriibe hett fir uns. On verra...


Item, mer saage danggerscheen emmene ganz originelle, soziaale und glungene Kopf und frooge-n-ys, was är ächtsch fir Antwoorte gäh hätti bi Hand uffs Härz – jä nai Sii, was fir e Zuefall, do sinn se jo scho:

1.  Was isch dy ydriggligschti Fasnachtserinnerig?
 dr ufftritt mit em „luggebiesser“, wo sy ergelimaa granggetshalber ussgfallen isch…
 
2. Was ka dy an dr Fasnacht närve?
 Bsoffeny Fraue und Männer, wo dr Aaschtand verliere!
 
2.  Welli drey Wörtr falle dir zem Begriff „Waggis“ spontan ii?¨
Intrigiere! (E hoochy Kunscht!)
Räppli (wo s en Ehr isch e Hampfle drvoo ab z bykho!!!)
En Elsässer, bym Märte!
 
3.  Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
Gohts no????? E Waggis-Naase kha nit lang gnueg syy!!!! am liebschte sin mr die, wo e glitzeryge naasedropfe draa hän!!
 
5. Basel ohni Fasnacht isch wie …. ?
….schnuufe ohny luft!
 
6. Was bringt di so richtig uff’d Palme?
arroganty bänggler, wo maine, sy syyge besser numme will sy e digge ranze und e guete röfrää hän…
 
7. … und ibr was kasch dy eso richtig froie?
iber ainzelmasgge, wo unscheniert bleedele dien und aim drmit s woohre „Yych“ vor Auge fiehre!
 
8. E liebs Familiemitgliid schänggt dir zem Geburtsdaag e FCZ-Saisonabo – was machsch?
lache! und druff warte, dass s saisonabi fir d muttenzerkurve fiirekunnt!
 
9. Wenn Ziiri ‚Downtown Switzerland’ isch, denn isch Basel… ?
the top of switzerland…
 
10. Was isch fir di dr scheenschti Ort z’Basel?
 S SBB-Bahnhof-Perron mit de Zig noo Ziiry!
 
11. Was wurdsch an Basel - odr an dr Schwiz - sofort ändere?
Basel sell Elsäässysch-Badensysch-Baslerisch wärde! – Mr hän dr glyych, gmainsam Ursprung… (Allemanysch)
Schwyz???? Hmm, was isch das???? E Konkordanz-Schtryt zwische linggs und rächts???!!!.... Als Basler gang y graaduss!
 
12. Mit wellem Mensch (ob lebändig odr nit) wottsch du gärn emol znacht ässe?
Mit em Otti Schtich – Alt-Bundesroot…. Dä het sy Departemänt entgeege allne Partei-vorgoobe gfiehrt…. Das isch fir mi e Held!
 
13. … und was wurdsch du die Person ganz sicher frooge?
 „Gööhn mr am näggschte Suntyg go Keegle?“
 
14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?
By 10 Tonne pro Moonet sett Schluss sy!!!! Dr Räschte gheert in d Jugendaarbet gschteggt!
 
15. Was nimmsch mit uff e-n-ainsami Insle?
My Frau!!! Do wird s dr nie langwyylyg!!!
 
16. Wär odr was bringt di sofort zem lache?
Dr Somm vo dr Basler Zyttyg! Will egaal, eb rächts oder linggs, dä hampelmaa isch doch d lachnummere sonderglyyche: „ich mache, was ich machen will und nicht, was die anderen sagen! Denn ich bin frei, das zu sagen, was christoph sagt!“
 
17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
Die Froog muessy dreifach byantworte!!!:
1.  em Guy Morin!
2.  em Anita, wo dur dr Schtänderoot fetzt
3.  mynere bessre Helfty, wo mir allewyl sait, was y z saage ha!