Also, mir gänn ys jo vyyl Mieh mit de Rahmetextli zue Hand uffs Härz – abr duet mr sorry, dr Däni, dä Nullachtfuffzäh Typ wo meint är syg weiss dr Guggr wär wil er e Jagge us Schwyynslädrimitaat hett … do gitt’s eifach nüt spannends z’brichte.
Und e guets Föteli hämmer au nit gfunde.
1. Was isch dy ydriggligschti Fasnachtserinnerig?
Wenn Passyvi ihri Angscht vorem Waggis vrliere, mit Luscht und Luune mitintrigiere und drnoo saage „schön ass es wytrgoht“
2. Was ka dy an dr Fasnacht närve?
Bsoffeni mit z’hoche Teschtoschteroonwärt, sexuell Fruschtrierti uff Freywildjagd (hüffig die glych Kategorie), die wo dängge das ganze syg drey Dääg Party am Ballermann… und nadürligg übr Aggro-Vordräblr wo intrigierende Waggis vo hinde e Crosscheck in Rugge gänn und das voll in Ornig finde.
3. Welli drey Wörtr falle dir zem Begriff “Waggis“ spontan y?
1) Fasnacht
2) Salz
3) Suppe
4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)
1 meter 37.5 mindischtens (und drnoo wott y gseh ob dr Sömi kha Larve baue…)
5. Basel ohni Fasnacht isch wie …. ?
… Muttenz ohni Kurve, e Root ohni Huus, e Waggis ohni Naase, e mi- ohni -nu, e Fährymaa ohni Fähri, e Morin ohni Grientee – he, y hoff si hänn di nit zahlt zem eso saublöödi Frooge usdängge!
6. Was bringt di so richtig uff’d Palme?
Lüt wo nit über e Tällerrand könne luege, wo arrogant, unhöflig und unfründligg sinn, ohni Muet ihri Vorurtail z’hintrfrooge, und wo dr Wäg vom gringschte Widrstand dr richtig finde.
7. … und ibr was kasch dy eso richtig froie?
Übr dr Wundr vom Lääbe, my Familie, e Meischtrfyyr, und Zyt mit digge Kolleege – nit z’vrgässe e Sponti-Sujethogg mit em Beni!
8. E liebs Familiemitgliid schänggt dir zem Geburtsdaag e FCZ-Saisonabo – was machsch?
Y tusch’s uff Ricardo y zem Gäägewärt vommene gleine Sagg Räppli (wenn y e Duubel kha übr e Tisch zieh)…
… odr abr, HEY ACHTIG IDEE!, y gib’s öbberem wo das wirkligg z’schetze weiss. Y dängg do an e bikannte Basler Schnitzelbänggler – dä isch so FCZ-Fan ass är sogar fir ihn perseenlig signierti Autogrammkarte sammlet...
9. Wenn Ziiri ‚Downtown Switzerland’ isch, no isch Basel… ?
… ‘Downtown Switzerland Northwest’ vyllicht – abr interessiert das wirgligg no?
10. Was isch fir di dr scheenschti Ort z’Basel?
Ammene laue Summroobe untr dr Brugg, zmits im Bach.
11. Was wurdsch an Basel - odr an dr Schwyz - sofort ändere?
Also:
Basel wird e FACEBOOK–freyi Zoone
Alli sötte jeede Daag studiere wo unsr Vaterland ohni Usländr wär – dr Jelmoli, dr Suchard, dr Sarasin, dr Bell, dr Bertarelli und dr Hayek sinn alli Usländr gsi, wott ys das öbbis saage?
Und dr Prof. Mörgeli bekunnt sy eige Museeum in dr Innere Mongoley (100% Arbet vor Ort für 100% Astelligsvrhältnis).
12. Mit wellem Mensch (ob lebändig odr nit) wottsch du gärn emol znacht ässe?
Mit em Herr Zensi
13. … und was wurdsch du die Person ganz sicher frooge?
“Sag emol, bisch du no ganz butzt?”
14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft
ych vrdien 8 Kischte im Johr - alles drübr find y totaal perväärs.
15. Was nimmsch mit uff e-n-ainsami Insle?
Dr ganzi SVP Vorstand – ych gang widr hei und lo se dört (mit 4 Stutz Nothilf pro Daag, y bi jo nit eso, und dr Herr Prof. Mörgeli dörf sy Hoorfärbschampoo mitnäh).
16. Wär odr was bringt di sofort zem lache?
All die wo ärnschthaft behaupte Basel syg e unsicheri Stadt.
17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?
Doch kei Froog, odr? Em Herr Zensi, dängg.
(und sött sich dä nit mälde: dr coolschte Ragazza nördlig vom Rhyy, dr Mina de Francesco)