Carlo Conti

Dr Carlo Conti isch am 1. Hornig 1954, grad vor dr Fasnacht, z’Basel uff d’Wält kho. Er hett z’Basel studiert und aigentligg isch alles uff e glassischi Basler Jurischtekarriere uusegloffe (Volontariaat an Verwaltigsgricht, Zivyylgricht und am Stroofgricht, 1982 Awaltspatänt, Advokatuur, Promotioon zem Dr. iur. 1985 und Laitr vo dr Rächtsabdailig in dr Hoffmann-La Roche bis 2000). Abr es isch bikanntliggerwyys andersch kho…

Bolytisch aggtiv isch dr Carlo syt 1978, wo-n-är mit 24 (!) Johr Gschäftsfiehrer vo dr CVP Basel-Stadt worde und fir die är 1983-92 und 1997-2000 im Grosse Root gsässe-n-isch. Er hett vo 1991-99 s’Presidium vo dr CVP ibrnoh, das Amt abr abgäh wo-n-är 2000 in Regierigsroot gwählt worde-n-isch (glatterwyys an Markus Lehmann; dr Carlo hett merci gsait und dr Markus fir Hand uffs Härz nominiert). Syt 2009 isch dr Carlo Regierigsvizepresidänt und Vorsteher vom Gsundhaitsdepartment.

Wo mer also bimmene Punggt wääre wo-n-ys Waggis sehr am Härz ligt: dr Gsundhait. Gsundi Ernährig isch ys e Härzensagläägehait: vyyl Vytamyyn C und kai Alkohool isch unsri Devyyse, immr gsi. Und mer wisse genau ass me friehner Gsundhait entwdr kha hett odr nit - wär se nit kha hett isch arm dra gsi. Syt dr Grindig vo de Granggekasse spilt’s abr kai Rolle ob me gsund isch odr nit – es sinn aifach alli arm dra. Dodrfir kha dr arm Carlo nit, also numme nit unrächt due.

Abr wie kha me do wirdige was dr Carlo alles laischtet fir d’Gsundhait vo dr Herr und Frau Basler? Mer hänn ys fir das glai Textli ebbis speziells loh yfalle – und sinn am Resultaat juscht vrschrogge. Wemme emol duet google mit de Suechwertr “Carlo Conti Gesundheit”, no gitt’s aim, me glaubt’s im Fall nit, 9’060 Syyte a. Und wemme die erschte 50 Syyte e chli genauer aluegt, no findet me folgendi Schlaagwertr:

 

Fessenheim: Ich bin gegen Atomkraftwerke, Spitex, Altersbolytigg, Life Saving Medication, e-health.com, Unispital für Stadt und Land, Rektor der Universitätsklinik für Herz- und Gefässchirurgie, Seniorenforum Basel, Medizin Basel-Bern: Gutachtensauftrag Spitzenmedizin, Spitex Basel wartet auf Termin bei Carlo Conti, Factsheet City Partnership Basel-Shanghai, Swiss Public Health Conference 2011, Rehab Basel, CVP Kanton Basel Stadt >> Vorstand, Carlo Conti beisst in den süssen Apfel, Neue Spitalpauschalen, Qualitätskontrolle, Kaufbare Schnellbehandlung in Spitälern, Basler liegen am häufigsten im Spitalbett, Nationale Gesundheitspolitik, Gesundheitskosten, Neue gemeinsame Life-Sciences-Strategie verabschiedet, Prämienprognosen der Krankenkassen, etc.

 

Jetz sell no ebber saage Bolytiggr haige z’weni z’due (odr dr Carlo setzi sich nit fir d’Gsundhait y); alles wo mir do no kenne saage isch “Gsundhait Carlo - und no vyyli vyyli Johr Fasnacht” (und wenn dr dr Sinn noch gsundr Ernährig stoht, no bisch bi de Waggis immr härzligg willkomme; mir hänn immr e chli Vytamyyn C fir di paraat – abr saisch ys no bitte was dr siess Epfel isch?).

 

 

1. Was isch dy ydriggligschti Fasnachtserinnerig?

„Die schönschti Fasnachtserinnerig git’s für mi aigendlig nid. Jedi Fasnacht isch ydrigglig. Jedes Johr wider vo neuem, wenn’s am Mändig vieri schloht!“

 

2. Was ka dy an dr Fasnacht närve?

„E Gleesli in Ehre und mängmol au zwei... Betrunggeni an der Fasnacht mien aber definitiv nit sy.“

 

3. Welli drey Wörtr falle dir zem Begriff „Waggis“ spontan y?

“Intrigiere, Seyblootere, e langi Naase und e grossi Schnure.”

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

„Worum vom Comité? Bruuchts do kai EU-Norm? Spass bisite: Nid alles muess gregelt si...“

 

5. Basel ohni Fasnacht isch wie …. ?

„Wie Haimweh oder wie grosse Durscht ohni Z’dringge in der Nöchi.“

 

6. Was bringt di so richtig uff’d Palme?

„Wenn gueti Lösige für Basel verhinderet wärde.“

 

7. … und ibr was kasch dy eso richtig froie?

„Wenn’s alle zämme richtig guet goht, also iber zfrideni Mensche.“

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

„Ich mach en Yladig zemene FCB-Match und zeig eso, ass en FCZ-Saison-Abo eigentlig völlig usegschosses Gäld isch...“

 

9. Wenn Ziiri ‚Downtown Switzerland’ isch, no isch Basel… ?

„Dr Buuchnabel vo dr Wält (und uff alli Fäll s Door zer Schwyz)“

 

10. Was isch fir di dr scheenschti Ort z’Basel?

„Do git’s vyl scheeni haimeligi Flägge, d Pfalz natirlig, aber au d’Stääge zu mim Cliquekäller...“

 

11. Was wurdsch an Basel - odr an dr Schwiz - sofort ändere?

„Meh Optimismus statt Pessimismus“

 

12. Mit wellem Mensch (ob lebändig odr nit) wottsch du gärn emol znacht ässe?

„Mit der Frau Fasnacht wär’s sicher no ganz spannend.“

 

13. ... und was wurdsch du die Person ganz sicher frooge?

„Ob si eigentlig au amme öbbis anders iss als Mählsubbe, Käs- und Ziibelewäije?“

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

„In Räbbli oder in Fränggli?“

 

15. Was nimmsch mit uff e-n-ainsami Insle?

„Uff ere ainsame Insle würds mer eigentlig gar nit eso guet gfalle… Drum nähmti höggschtens s Ticket für der Ruggflug am andere Morge mit…“

 

16. Wär odr was bringt di sofort zem lache?

„E Politiker wo meint, är könnt mir in zwei Wort d Wält erkläre.“

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

„GR-Präsident Markus Lehmann“