André (Andy) Jäggi

Jetz wird’s hegschti  Zyt ass emol e Altwaggis sy Hand uff’s Härz legt.

Dr André (Andy) Jäggi isch scho uff em Wagge am Cortège mitgfahre wo d’Drämmli no offe gsi sinn und mir z’Basel no Gasladäärne kah hänn (und vyyli vo de hittige Fasnächtler no Stärnli butzt hänn). Noch dr Jumpferefahrt im 1960 isch är 30 Johr lang aggtiv bi de Basler Clochards gsi – ihm macht niemmer ebbis vor wenn’s um unser wärt Metier goht, säll isch glar. Und wär s’Gligg hett, emol mit em Andy bi emmene Tee (odr ähnligs) die alte Zyyte Revue passiere z’loh, dä erfahrt schampar vyyl ibr d’Gschicht vom Waggis - au wie sich d’Fasnacht (und Basel) im letschte halbe Johrhundert veränderet hett… zem guete wie zem schlächte.

Dr Andy legt Wärt druff ass är sich als Alt-Waggis im Stand vo dr wohlverdiente Rueh bifindet und nimmi (eso) aggtiv tätig isch. Fir dr Bâlaari abr hett är e „gaischtigi Usnahm“ gmacht – zem guete Gligg, kah me numme saage, und drfir gitt’s e härzligg danggerscheen!

 

 

1. Was isch dy ydriggligschti Fasnachtserinnerig?
Wo mer als Basler Clochard's s'erschtmool mit em Waage in dr Cortège iigfaare sin (1960)

 

2. Was ka dy an dr Fasnacht närve?
Mit vom Boode uffgläsene Räppli beworfe z'wärde

 

3. Welli drey Wörtr falle dir zem Begriff „Waggis“ spontan y?

E „verruggte Dyssi“ us em „Elsass“ mit ere „Suffernase“.

 

4. Sell d’Waggis-Naaselengi vom Fasnachts-Comité reguliert wärde? (falls jo, uff wie lang maximal?)

Nai, d'Längi reguliert sich vo sälber (luegsch bim 3.)

 

5. Basel ohni Fasnacht isch wie …. ?

E Profässer ohni Studänte

 

6. Was bringt di so richtig uff’d Palme?

Wenn Wurfmaterial us em Waage gstibitzt wird

 

7. … und ibr was kasch dy eso richtig froie?

Guets Intrigiere vomene Waggis (es gits nur no sälte)

 

8. E liebs Familiemitgliid schänggt dir zem Geburtsdaag e FCZ-Saisonabo – was machsch?

Uff em Floomärt „verschutte“

 

9. Wenn Ziiri ‚Downtown Switzerland’ isch, denn isch Basel… ?

Top of the World (es isch zwar gstoole vo St. Moritz)

 

10. Was isch fir di dr scheenschti Ort z’Basel?

S'Glaibasel am Ryy, denn vo dert isch s'Grossbasel am scheenschte z'bschaue

 

11. Was wurdsch an Basel - odr an dr Schwiz - sofort ändere?

d'SVP uffleese

 

12. Mit wellem Mensch (ob lebändig odr nit) wottsch du gärn emol znacht ässe?

Bürgin Christoph B., Fasnachts Comité-Obmaa; är isch e Zunftbrueder vo mir (Wääbere), dert han y scho 2 Mittagässe mit em gnosse

 

13. ... und was wurdsch du die Person ganz sicher frooge?

Kennt me nit de Ainzelmasgge (z.B. Waggis) Subventione zue lo koo? (nit zvyl, aber gnueg)

[Amerggig vo dr Redaggtioon: das vrdient Unterstitzig!!]

 

14. Was isch fir di dr Maximallohn wo-n-e Mensch pro Johr derft verdiene, egal wo und wievyyl är/sie schafft?

Die oberi Garde bekunnt oonehin z'vyl, vergliche zue dämm wo sy aigetlig verdient! Aber by Zaale isch sowiisoo alles „relativ“!

 

15. Was nimmsch mit uff e-n-ainsami Insle?

E „alt Dante“. Y kenn sy guet, aber y sag nit wär's isch

 

16. Wär odr was bringt di sofort zem lache?

E guete Witz im rächte Moment (leider kann y sy nur sälte b'halte)

 

17. Letschti Froog, Hand uff’s Härz: wäm wurdsch du die Frooge am liebschte zem beantworte gäh?

Das kann y kainere Person vo mym Umfäld zuemuete. Y will kai Frind oder „Frindin“ verliere...