Weisch wär de bisch?

S isch ain vo de erschte warme Dääg vom no junge Summer gsi, wo dr Fäährymaa in kurze Hoose und sym gliebte „ych bi nid du!“-Lyybli uff dr Fäähry ghoggt isch.

Kurz vor em Mittag het e jungy Daame, miteme Buschi im Traaggschtältli am Buuch, welle uff d Groossbasler-Sytte gschifft wärde.

Noodäm sy ihry 12 Batze zahlt gha het -s Buschi isch gratis gfaahre-, het sy vom Fäährymaa welle wisse, was das denn fir e glungene Schpruch uff däm Tyyschy (T-Shirt) syygy.


Dr Fäährymaa het se miteme Grinse im Gsicht aagluegt und gmaint: „Was mainsch was das haisst?“


Die jungy Mamme het e weeneli sinnyert und gmaint, dass es ihre jo klaar syg, dass är nid „si“ kenny syy…. Will si syg jo au nid Fäähryfrau.


Dr Fäährymaa het glächlet und bymerggt, dass sy scho ganz nooch draa syygy an dr Leesyg zu dr Ussaag vom Tyyschy! …. Aber erscht ganz nooch draa!


Die Daame het denn gmaint: „Also Du bisch nid e Mamme, wien yych! Du bisch e Maa und kai Frau! Yych bi kai Kapytäänyn. Yych bi kai Maa. Yych bi nid uffem Rhyy am schaffe…Und…und und…jä was denn au?“


„Gnau das isch es, was y wett usleese mit mym Lyybli!“ het dr Fäährymaa gmaint.

„Dass de dr nid iberleggsch, was de NID bisch, sondern WAS und WÄR de bisch!“.

 

Das junge Mammi isch dr Räscht vo dr Fahrt ganz ruehyg worde.

 

Bym Usschtyyge het sy fescht em Fäährymaa d Hand druggt, het em Buscheli ibers Kepfli gschtryychlet und gmaint: „Ych bi dr gliggligscht Mensch! Dangge Fäährymaa!“.