S Adpfänterli

S isch am erschte Adväntssunntyg gsi, wo dr Fäährymaa by herrligem, aber kaltem Wätter, unterhalb vo dr Pfalz uff em Schlabbe gsi isch.

Är isch uffem Bänggli ghegglet und het de Wälle vom Babbe Rhyy noochegluegt.

Do sin zwai Kinder zuegschtiige. Es isch s Lisbeth und dr Rämschgeli gsi: D Bobberli vo sym Noochber Balz uss dr Utegass. Dr Balz isch e yygflaischte Glaibasler und Fasnächtler gsi. Als Waggis het är allewyl die heerrligschte Idee kha und mit synere Art het är ally kenne begaischtere.

Dass s Lisbeth, wo scho in d Primeli gangen isch und dr Rämschgeli, no e Hääfelischieler, au scho aagschteggt worde sin vom Waggis-Lääbe, verschtoht sich von ellai!

Die zwai Kinder sin uffem Wiehnachtsmärt bym Minschter ammene Schtand go e wunzygs Waggis-Fygyyrli go kaufe, wo sy ihrem Babbe hän welle uff d Wiehnacht schängge.

Dr glai Rämschgi isch fascht verzwatzlet vor lutter Vorfrayd uff d Wiehnacht… und erscht noo uff d Fahrt mit dr Fäähry. In däm Ibermuet het är aagfange singe, wien e Groosse. Dass är drbyy e baar Kindergartelieder durenand brocht het, het niemets gschteert.

„Es glepft, e Schuss, dr Fäährymaa! …Und ych bin e Waggis, was bisch du?..ych geehren e Gleggli, Adpfänt-Adpfänt!...“ soo het är mit ere undefynierbaare Melodyy gschmätteret.

Die andere Lyt uff em Schiffli hän dä Sängerknaab aaglächlet - numme s Lisbeth het sich e weeneli gschämmt fir ihre glai Brueder.

Em Fäährymaa isch aber pletzlig e Liechtli uffgange: Egaal eb Vogel-Gryff, eb Waggis-Fasnacht oder Wiehnacht: D Vorfrayd isch die greescht Frayd! …und: Das isch glaub das, wo me als Advänt sett lääbe! D Vorfrayd!

Während dr Iberfahrt in s mindere Basel het sich dr  Fäährymaa vorgnoh, mit em Balz e Vorfasnachts-Veraaschtaltyg ussem Boode z schtampfe… Dr Titel het är scho kennt: „S Adpfänterli“.

 

(mjps 2013)