S isch scho im Novämber gsi, wo dr Fäährymaa wägem erschtuunlig warme Wätter, no allewyyl ally Händ voll z tue gha het.
Fascht im Mynute-Taggt hän d Gleggli an de Fäährschtääg bimbbelet, fir dass es Schiffli au joo zyttyg wurd kho.
By ainere vo däne Fahrte isch e ganz e kuurlig Grippli vo drey Männer zuegschtige.
Sy hän ally zimmlig finschter dryygluegt und vo dr Aaleegy här, hän sy unter ihrne Kittel no allergattyg Zyyg mit sich ummedrait!
Dr Fäährymaa het schnäll gmerggt, dass die Heere Schutzweschte draage und dass die Byyle an de Hifte vo Byschtoole und sunschtyge Bolyzeisache här kemme.
Wo dr Fäährymaa gfroggt het, eb die Heere denn Schugger syyge, het aine gmaint:
„Jo! Aber frooge sy nid wytters, Fäährymaa! Mr sin in ghaimer Missioon unterwäggs!“.
Jetzt isch s im Fäährymaa aber himmelmässyg wind und weh worde! Är het gluegt, was denn no sunscht fir Lyt uffem Schlabbe sin. Vilicht gar e Terrorischt?
S isch aber nummen e alte Maa no im Schtyyrhuus gsässe, wo säälyg vor sich hii deest het und rächt friidliyg dryygseh het.
Wo die drey Schugger und s alte Männli ussgschtige sin, het dr aint Schugger numme gmaint:
„MbdlwW!“.
Am Fyyroobe isch dr Fäährymaa dehaime im „Booble“ go die Buechschtaabe yygäh.
„Mir beschitze dr letscht woohry Waggis“ isch drbyy uusekho. S isch e Link zu dr Fasnachtsbolyzei gsi und es het e Kurze Beschrib zu dääre Aggtion gha.
Anschyynend het dr Fäährymaa dr letscht Verdrätter vo dr woohre Waggis-Zunft uff sym Boot gha.
Dass me dää esoo sell beschitze miesse, isch im Fäährymaa aber komysch vorkho…
Denn ächty Waggis bruuche kai Bolzeyschutz! Und ächty Waggis git s noo ganz e huffe!
Aber irgendwie treeschtlig: Die drey Schugger hän ändlig emoolen e wichtygy Uffgoob gha!