S isch ammene scheene Friehsummer-Daag gsi, wo dr Fäährymaa wider e Tschupplete Lyt het kenne transportiere.
Fir d Joohreszyt isch s scho zimmlig warm gsi und d Marronny-Männli hän definytyyv uff „Gelato“ umgschtellt gha.
Will in dr Muschtermäss grad d Kunschtussschtellyg „Art“ gsi isch, hän d Fäähry-Gescht ehnder zu dr erlauchte, illuschtre, ghoobenere Klass gheert.
D Männer hän Armani-Aazig drait, d Fraue hän Dior-Däschli gschwunge und d Bobberli, also d Kinder, hän ihry Glace-Flägge uff ihrne Tommy-Hilfiger-Lyybli verdailt…
Numme ai eltere Heerr isch no uff dr Fäähry gsässe, wo nid ganz ins Bild basst het. S isch dr Megge, en ehemoolyge Waggiswäägeler vo de „Bâlefyyse“ gsi, wo sich in alte, abgschnittene Bauellehoose und emene vier-frangge-fuffzyg-Unterhemmli uss em Konsy an Bängglirand vom Schlabbe druggt het.
Wo die ganzy „High-Snobiety“ unterem Minschter s Schiffli verlooh gha het, isch dr Alt-Waggis zum Fäährymaa gschtande und het gmaint:
„S isch scho truuryg fir die Lyt!
Sy hän Alles! Sy hän Gäld, wie dr Rhyy Fischli het !
– Sy hän e Yacht im Meer, wo 50 Mool greeser isch als Dyny Fäähry!
– Sy hän e Naame, wo macht, dass iberall, wo sy aanekemme, e roote Debbyg gussgrollt wird!
Aber Frayd am Lääbe hän sy trotzdäm nid meh!“
Do het dr Fäährymaa als alte Psycholoog und Lääbenskinschtler – ohny z iberleege - zum Megge gmaint: „Und waisch wurum? Sy hän kai Zyt, zum s Lääbe z gniesse!“
Die baide hän sich in d Auge gluegt und hän sich e brait Grinse gschänggt.
Dass die baide uff dr Glaibasler-Sytte zämme in d Fischerschtube sin go aine zwitschere isch wohr!
Will sy hän ally Zyt und ally Frayd vo dr Wält gha!