s'Prinzip 'Fasnacht vo unde'

Aigentligg isch dr Waggis jo ain vom Volgg (Histoorischs zem Waggis). Abr duur all die technische Fortschritt sinn d’Waggiswääge immr hecher worde und wäge all de Abschranggige (mer saage numme Clarastross!) isch dr Abstand zwische Waggis und Passive immr gressr woorde. Das hett drzue gfiehrt ass es immr wenigr Kontaggt gäh hett und ass jetz vyyli schampaar Angscht hänn vor ys. Säll finde mer gspässig, worum drvoo seggle wenn e baar Waggis a z’zoggle kemme – e baar Räppli hänn no niemerem gschaadet. Und schnuure kha doch au jede.

Nüt gege Waage, ibrhaupt nit. Nit zem falsch vrstande wärde, Fasnacht uffem Waage isch aifach phenomenaal, me kha’s fasch numme mit emmene Bild beschryybe:


Waggis khasch nit wäärde, Waggis das muesch syy!
Waggis khasch nit wäärde, Waggis das muesch syy!

Abr es goht eso schnäll vrbyy und me hett fasch kai Kontaggt mit de Lyt, dasch doch aifach schad. Ai guete Grund worum mer Fasnacht vo unde mache: du bisch Aggtive untr allne Passive und die kenne nit ewägg in dr Druggedde (und du als Waggis hesch immr Blatz). Und ebbis vom scheenschte-n-isch aifach Passivi ahaue, emmene Ahnigsloose vo hinde uff d’Schultere glopfe un drnoo luege wie sich die dien metzge bim Intrigiere (Histoorischs zem Waggis). Die mergge drnoo relativ schnäll ass si sich jo kenne uuseschnuure und das gitt denn Gspröch und Pointe wo d’Fasnacht ibrduure. Aim emol d’Däsche fille, d’Frau futtschigge und mit ihrem Maa e chli ibr dr Unsinn vo dr Ehe diskutiere, d’Lyt dr Zeedel lo vorlääse und wildfremde e Glas Wysse spendiere... au das isch Fasnacht.

Es isch au immr widr spannend wievyyl Lyt zu uns kemme und mit uns wänn schwätze; 2010 hett sich dr Beni Huggel vor s'Wäägeli gworfe will är mit uns hett wölle schnäädere, 2011 hett ys die liebi Regula ihr halb Lääbe vrzellt, 2012 hämmer e totaal spannendi Intrigiersession mit emmene behinderte Meitli kha ... Erinnerige wo me nie vrgisst.

Mer luege au immr ass mer s’Wägeli eso baue ass mer Passivi kenne ybinde und in Aggtivitääte involviere, das kunnt immr schampar guet a und nimmt e chli d’Hemmige. Und baut vyllicht au e baar Vorurdail ab.